Gjykata Themelore në Pejë ua ka caktuar masën e paraburgimit katër të arrestuarve, Valbona Pakashtica, Anes Pakashtica, Irfan Pakashtica dhe Idriz Hajrizi që dyshohen për fajde, detyrim dhe rrëmbim.

Mbrojtësi i Hajrizit, avokati Migjen Mekaj ka konfirmuar se gjykata ka vendosur t’i lë në paraburgim katër të dyshuarit.

“Betimi për Drejtësi” ka raportuar sot gjatë ditës për kërkesën e Prokurorisë Themelore në Peje, e cila kërkoi paraburgim për të dyshuarit.

Prokuroria e Pejës kërkon paraburgim ndaj katër të dyshuarve për fajde, detyrim dhe rrëmbim

Prokuroria Themelore e Pejës ka kërkuar masën e caktimit të paraburgimit ndaj Valbona Pakashtica, Anes Pakashtica, Irfan Pakashtica dhe Idriz Hajrizi që dyshohen për fajde, detyrim dhe rrëmbim.

Propozimin për masën e paraburgimit, Prokuroria e ka kërkuar për shkak se ekziston edhe rreziku i arratisjes, për shkak se të pandehurit Irfan dhe Valbona Pakashtica gjatë zbatimit të masave të veçanta hetimore kishin planifikuar që të largoheshin nga Republika e Kosovës, të shisnin pasurinë dhe të shpërnguleshin jashtë, e po ashtu edhe i pandehuri Idriz Hajrizi, për një kohë kishte jetuar jashtë Kosovës.

Andaj sipas kërkesës lënia e në liri thuhet se ekziston mënyra e arratisjes së tyre dhe pengojnë rrjedhën normale të procedurës penale, e si dhe ndikimin në dëshmitarë dhe asgjësimin e provave.

Sipas kërkesës së siguruar nga “Betimi për Drejtësi”, Prokuroria ka kërkuar të caktohet paraburgimit për shkak se janë plotësuar kushtet e parapara sipas dispozitave ligjore që të pandehurit Valbona, Anes dhe Irfan Pakashtica që dyshohen për “fajde”, “detyrimi”, dhe “rrëmbimi”, ndërsa i pandehuri Idriz Hajrizi dyshohet për ‘detyrim.

Nga kërkesa thuhet se ishin plotësuar kushtet themelore për ekzistimin e bazuar se të pandehurit kishin për t’i kryer veprat penale të cekura sipas vendimit për fillimin e hetimeve dhe zgjerimin e hetimeve.